El “Bloque” pol Engañu.

Carlos X. Blanco.

Hai votantes a piñón fixu, hai votantes nuevos que cadecen de perspeutiva hestórica, hai y tien d´haber de too. Ye nidio que n´Asturies trunfa la continuidá. Ye persabío que les fuercies nacionalistes asturianes nun algamaron un bon resultáu. Nin tampocu sacaron munchu eses otres siegles rexonalistes qu´avecen facer de la llingua asturiana una bandera, eses que se nomen a sí mesmes “asturianistes”. La xente , a tiru fixu, venga votar en masa al PSOE y a PP y, en menor midida, a IX. N´eso, el comportamientu del País Asturianu nun paez mui estremáu del qu´había d´esperase en cualisquier otra “Rexón” Española. Ellectorialmente Asturies sigue siendo mui “española”, y sinón camuden les coses, anque mos cueste dicílo, cada vez más y más “española” pa tolo demás.

Lo primero, lo del votu de piñón fixu. El votu que se supón d´esquierdes ye, en bona midida, un votu cautivu y servil. Quiero dicir qu´igual que la xente en masa vota a Areces podía votar a Alfonso Guerra cuando nos mítines de Camas, Dos Hermanas y otres localidaes andaluces glayaba aquello de “¡Que vien la derechona, la derecha cavernícola!”. Los socialistes glayaben a esos xornaleros y “descamisaos” que, depués d´una hestoria proletaria d´esplotación, lluches y sufrencies, habíen dexenerao en bona parte nun coleutivu parasitariu que, depués de cada mítin y cada votu coloráu, poníense a la cola cola mano abierta pa que-yos apurrieren un bocadillu mortadela o, meyor entá, el salariu del PER. Bono, pues con razón nos nomen perende a los irredentos ástures los “andaluces del norte”. Equí, envede xornaleros, el votu cautivu del “mieu a la derechona” sostitúyese pol votu d´ex-mineros, pensionistes, prexubilaos y muchos munchos “xornaleros del mundu postindustrial” a los que nun-yos interesa un braeru cambeu de les coses. Cambien los cancios, en cuenta de “Aceituneros de Jaen” invócase eso “Mio Güelu foi picador...” Pero la situación ye la mesma. Votar a Areces ye´l votu de los descamisaos d´Alfonso Guerra. Nin más nin menos. Gueyu: pero dalgún d´esos descamisaos tienen la cartera enllena billetes, bon coche, y puestinos llambiones en sindicatos, empreses subsidiaries del Poder, ayuntamientos, y Oficines Públiques de Nun Facer un Res.

A la fin: dexenaración del simbolismu de la “esquierda internacionalista”. Los antaño esplotaos xornaleros andaluces y mineros asturianos, yá nun tan tan esplotaos pero los sos heriedes entá mueven la gafienta iconografía del “Pogresismu” y l´”Estáu del Bonestar”, yá que nun de la “Revolución Proletaria”.

D´un país parasitariu en bona midida, qué quremos: votu parasitariu. Yá conozo les siegles PSOE mandando nel mío País dende mozu, y alcuérdome de los palos qu´esi PSOE mandó dar pa primir a los obreros. Alcuérdome de les furgonetes enxaulaes aparcaes en Begoña (Xixón) y saliendo cada pocu pa dar palos y más palos en nome d´una Reconversión forzosa, cásique militarizada. Y alcuérdome de l´autopista, nel semáforu de la Sindical, vía fileres enormes de furgonetes policiales qu´apotarben a diariu dende Valladolid o quésiyo ónde, pa lo mesmo: Pa neutralziar un país a palos. Qué queréis que vos diga: les imáxenes queden grabaes nos años mozos de la vida, y pa siempres. Pa min, PSOE foi dénde entós y pa siempre, satamente esto: ordeno y mando cola Policía per delantre. Asima curtiaron tou proyeutu d´autoxestión económica d´Asturies, en nidia continuidá dende´l franquismu. El PSOE foi eso y va siguir siéndolo. Yo nun soi a enfotame n´ellos dende va más de 20 años.

Del PP, inclúi d´esos “asturianistes de centru-derecha”, ni falar quiero. Que falen Don Gabino y “Felechosa” ente ellos tol bable que-yos pete. Yo quédome cola semeya de les Azores.

Pero agora vamos col continuismu ¡“esquierdista”! D´IX. Tamién -¿yá diré pa vieyu?- teo alcordances de la trayectoria del PCE. Favoratibles de mano a les dictadures soviétiques, aportó equí Carrillo engüeltu na bandera roxi-gualda, y entós munchos aldovinaron que daqué raro pasaba. Darréu, eso del “eurocomunismu”. Llueu, los sos ideólogos empobinaos al centrismu del PSOE. Cristina Almeida, Xerardín Iglesias, etc... ¡Grandes ideólogos! La flor y la ñata del marxismu. Pero vamos más a lo de nueso.

Nel 2003, cuatro díes (comu´l que diz) enantes de les elleiciones, formen un partidín. Tan piquiñín como too lo que s´inventa n´Asturies, la patria del diminutivu. Un partidín de cuatro, que ni tan siquiera siguen atreviéndose a nomalu partíu polítu. Ye, como dicen, un “estrumentu”. El Bloque por Asturies naz adosáu a IX pa facer collecha, dicen, del “votu nacionalista d´esquierdes”. Ensin tener esistencia independiente nunca enxamás, adosáu al Partíu Comunista y al so votu inercial (la inercia de la tradición obrera d´Asturies), agora dedíquense a repartir lleña a los que nun algamen representación institucional. Ellos sí, claro. Ellos sí l´algamen gracies al so primu de Zumosol, la IX (¿Izquierda? ¿Xunida?) Algunes cares son como de formigón armáu. Y nun miro pa naide. O seya, qu´un “estrumentu” (el propiu BA diz qu´eso ye namá) pue dar lleiciones. Dende llueu, BA, vosotros sois “un partíu de mases”. El vuestru pesu nel caberu “tripartitu” foi la Quinta Sencia. Tan quintaesencia que ni tan siquiera se nota , a nun ser por espardir “solidaridá pel mundu alantre”. ¡Viva´l mundu! Vosotros y Valledor sois los validores del bable, probe criatura n´estinción. Quien quiera bable oficial, ENSIN IMPOSICIÓN, tien de querevos a vosotros. Prestaríame a mi saber si l´”estrumentu” presentáu en solitariu recaudaría tres o cuatro votos en cada circunscripción.

Vamos ho. Engañáis, pero non a toos, ni tol tiempu. Comunistones españolones d´IX: esos inventos nun pueden engañar. A lo meyor ye verdá qu´a munchos asturianos la so llingua y la so nación-yos traye ensin cuidao. Había que replantegase munches coses nel nacionalismu astur. Nun digo que non. Daqué se tien de facer mal pa tener estos resultaos probetayos. Pero los “estrumentos” y los inventos valledorianos nun engañen namás qu´a los que quieren dexar ser engañaos. Yo acepto los resultaos comu´l que más. Nun me presten, pero ye lo qu´hai. Pero´l rabalbu d´un “asturianismu” inventáu, oportunista, “de diseñu”, ye intolerable. Siguií viviendo de la política. Meyor pa vosotros. Munchos tenemos otros oficios pa ganar les fabes. Pero tienen de saber los “Estrumentos” que nun van engañar más alló de los cuatro cautivos y de  les cuatro boques de peselbre.